Melanoma Cases In UK : ਯੂਕੇ ‘ਚ ਸਕਿਨ ਕੈਂਸਰ ਦੇ ਸਭ ਤੋਂ ਖਤਰਨਾਕ ਰੂਪ Melanoma ਦੇ ਮਾਮਲੇ ਤੇਜ਼ੀ ਨਾਲ ਵੱਧ ਰਹੇ ਹਨ। ਹਾਲ ਹੀ ਵਿੱਚ ਜਾਰੀ ਹੋਈ Cancer Research UK ਦੀ ਰਿਪੋਰਟ ਮੁਤਾਬਕ ਸਾਲ 2022 ਵਿੱਚ ਯੂਕੇ ਵਿੱਚ 20 ਹਜ਼ਾਰ ਤੋਂ ਵੱਧ ਲੋਕਾਂ ਵਿੱਚ ਮੇਲਾਨੋਮਾ ਦੀ ਪੁਸ਼ਟੀ ਹੋਈ, ਜੋ ਹੁਣ ਤੱਕ ਦਾ ਸਭ ਤੋਂ ਵੱਡਾ ਅੰਕੜਾ ਹੈ। ਰਿਪੋਰਟ ਮੁਤਾਬਕ ਜੇ ਇਹੀ ਰਫ਼ਤਾਰ ਜਾਰੀ ਰਹੀ ਤਾਂ 2040 ਤੱਕ ਹਰ ਸਾਲ ਕਰੀਬ 26,500 ਲੋਕ ਇਸ ਬਿਮਾਰੀ ਦਾ ਸ਼ਿਕਾਰ ਹੋ ਸਕਦੇ ਹਨ।
ਪੁਰਸ਼ ਜਾਂ ਮਹਿਲਾਵਾਂ- ਕਿਸ ਵਿੱਚ ਵੱਧ ਰਿਹਾ ਖਤਰਾ?
ਰਿਸਰਚ ਅਨੁਸਾਰ ਪੁਰਸ਼ਾਂ ਵਿੱਚ ਮੇਲਾਨੋਮਾ ਦੇ ਮਾਮਲਿਆਂ ਵਿੱਚ 23% ਅਤੇ ਮਹਿਲਾਵਾਂ ਵਿੱਚ 26% ਤੱਕ ਵਾਧੇ ਦੀ ਸੰਭਾਵਨਾ ਹੈ। ਸਭ ਤੋਂ ਵੱਧ ਚਿੰਤਾ ਬਜ਼ੁਰਗ ਲੋਕਾਂ ਨੂੰ ਲੈ ਕੇ ਜਤਾਈ ਗਈ ਹੈ। 80 ਸਾਲ ਤੋਂ ਵੱਧ ਉਮਰ ਵਾਲੇ ਲੋਕਾਂ ਵਿੱਚ ਪਿਛਲੇ 10 ਸਾਲਾਂ ਦੌਰਾਨ ਮੇਲਾਨੋਮਾ ਦੇ ਮਾਮਲਿਆਂ ਵਿੱਚ 57% ਵਾਧਾ ਦਰਜ ਕੀਤਾ ਗਿਆ ਹੈ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸਦਾ ਸਭ ਤੋਂ ਵੱਡਾ ਕਾਰਨ ਜ਼ਿਆਦਾ ਸਮੇਂ ਤੱਕ ਅਲਟਰਾ ਵਾਇਲਟ (UV) ਕਿਰਨਾਂ ਦੇ ਸੰਪਰਕ ਵਿੱਚ ਰਹਿਣਾ ਹੈ। ਰਿਪੋਰਟ ਮੁਤਾਬਕ ਯੂਕੇ ਵਿੱਚ ਲਗਭਗ 90% ਮੇਲਾਨੋਮਾ ਦੇ ਮਾਮਲੇ ਤੇਜ਼ ਧੁੱਪ ਅਤੇ ਸਨਬੈਡ ਦੇ ਇਸਤੇਮਾਲ ਨਾਲ ਜੁੜੇ ਹੋਏ ਹਨ। ਅਰਥਾਤ ਹਜ਼ਾਰਾਂ ਮਾਮਲੇ ਸਹੀ ਸਾਵਧਾਨੀ ਨਾਲ ਰੋਕੇ ਜਾ ਸਕਦੇ ਸਨ।
UV ਕਿਰਨਾਂ ਦਾ ਵੱਡਾ ਖਤਰਾ
ਇੰਟਰਨੈਸ਼ਨਲ ਏਜੰਸੀ ਫਾਰ ਰਿਸਰਚ ਆਨ ਕੈਂਸਰ ਦੀ ਇੱਕ ਹੋਰ ਸਟਡੀ ਵਿੱਚ ਵੀ ਹੈਰਾਨ ਕਰਨ ਵਾਲੇ ਅੰਕੜੇ ਸਾਹਮਣੇ ਆਏ ਹਨ। ਸਾਲ 2022 ਵਿੱਚ ਦੁਨੀਆ ਭਰ ਵਿੱਚ ਸਾਹਮਣੇ ਆਏ ਮੇਲਾਨੋਮਾ ਦੇ 80% ਤੋਂ ਵੱਧ ਮਾਮਲੇ UV ਰੇਡੀਏਸ਼ਨ ਨਾਲ ਜੁੜੇ ਪਾਏ ਗਏ। ਡਾਕਟਰਾਂ ਦੇ ਅਨੁਸਾਰ ਮੇਲਾਨੋਮਾ ਚਮੜੀ ਦੀਆਂ ਉਹਨਾਂ ਸੈੱਲਾਂ ਵਿੱਚ ਬਣਦਾ ਹੈ ਜੋ ਮੇਲੇਨਿਨ ਤਿਆਰ ਕਰਦੀਆਂ ਹਨ। ਇਹੀ ਮੇਲੇਨਿਨ ਸਾਡੀ ਚਮੜੀ ਨੂੰ ਰੰਗ ਦਿੰਦਾ ਹੈ। ਇਹ ਕੈਂਸਰ ਇਸ ਲਈ ਜ਼ਿਆਦਾ ਖਤਰਨਾਕ ਮੰਨਿਆ ਜਾਂਦਾ ਹੈ ਕਿਉਂਕਿ ਇਹ ਤੇਜ਼ੀ ਨਾਲ ਸਰੀਰ ਦੇ ਹੋਰ ਹਿੱਸਿਆਂ ਵਿੱਚ ਫੈਲ ਸਕਦਾ ਹੈ।
ਮਹਿਲਾਵਾਂ ਵਿੱਚ ਵੱਧ ਮਾਮਲੇ
ਰਿਪੋਰਟ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ 55 ਸਾਲ ਤੋਂ ਘੱਟ ਉਮਰ ਦੀਆਂ ਮਹਿਲਾਵਾਂ ਵਿੱਚ ਮੇਲਾਨੋਮਾ ਦੇ ਮਾਮਲੇ ਪੁਰਸ਼ਾਂ ਨਾਲੋਂ ਵੱਧ ਮਿਲ ਰਹੇ ਹਨ। ਇਸਦਾ ਇੱਕ ਕਾਰਨ ਧੁੱਪ ਵਿੱਚ ਜ਼ਿਆਦਾ ਸਮਾਂ ਬਿਤਾਉਣਾ ਅਤੇ ਟੈਨਿੰਗ ਦੀ ਆਦਤ ਮੰਨੀ ਜਾ ਰਹੀ ਹੈ।
ਮਾਹਿਰਾਂ ਨੇ ਲੋਕਾਂ ਨੂੰ SPF 30 ਜਾਂ ਇਸ ਤੋਂ ਵੱਧ ਵਾਲੀ ਬ੍ਰਾਡ-ਸਪੈਕਟ੍ਰਮ ਸਨਸਕ੍ਰੀਨ ਵਰਤਣ ਦੀ ਸਲਾਹ ਦਿੱਤੀ ਹੈ। ਨਾਲ ਹੀ ਪੂਰੇ ਸਰੀਰ ਨੂੰ ਢੱਕਣ ਵਾਲੇ ਕੱਪੜੇ ਪਹਿਨਣ, ਤੇਜ਼ ਧੁੱਪ ਵੇਲੇ ਛਾਂ ਵਿੱਚ ਰਹਿਣ ਅਤੇ ਸਨਬੈਡ ਤੋਂ ਦੂਰ ਰਹਿਣ ਦੀ ਵੀ ਸਲਾਹ ਦਿੱਤੀ ਗਈ ਹੈ।
ਕਦੋਂ ਹੋਣਾ ਚਾਹੀਦਾ ਹੈ ਸਾਵਧਾਨ?
ਮਾਹਿਰਾਂ ਦੇ ਮੁਤਾਬਕ ਜੇ ਚਮੜੀ ‘ਤੇ ਨਵਾਂ ਤਿਲ ਨਜ਼ਰ ਆਵੇ, ਪੁਰਾਣਾ ਤਿਲ ਆਪਣਾ ਰੰਗ ਜਾਂ ਆਕਾਰ ਬਦਲਣ ਲੱਗ ਪਏ ਜਾਂ ਕੋਈ ਘਾਅ ਲੰਬੇ ਸਮੇਂ ਤੱਕ ਠੀਕ ਨਾ ਹੋਵੇ ਤਾਂ ਤੁਰੰਤ ਡਾਕਟਰ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਜੇ ਬਿਮਾਰੀ ਸ਼ੁਰੂਆਤੀ ਪੜਾਅ ਵਿੱਚ ਪਤਾ ਲੱਗ ਜਾਵੇ ਤਾਂ ਇਲਾਜ ਸਫਲ ਹੋਣ ਦੀ ਸੰਭਾਵਨਾ ਕਰੀਬ 95% ਤੱਕ ਹੁੰਦੀ ਹੈ।
Check out below Health Tools-
Calculate Your Body Mass Index ( BMI )
Calculate The Age Through Age Calculator
ਹੋਰ ਪੜ੍ਹੋ