Jalandhar News : ਜਲੰਧਰ ਦੇ ਰਾਮਾ ਮੰਡੀ ਇਲਾਕੇ ‘ਚ HDFC ਬੈਂਕ ਦੇ ATM ਵਿੱਚ ਧੋਖਾਧੜੀ ਦਾ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਜਿੱਥੇ ਠੱਗਾਂ ਨੇ ਮਸ਼ੀਨ ਨਾਲ ਛੇੜਛਾੜ ਕਰਕੇ ਇੱਕ ਮਹਿਲਾ ਅੰਜੂ ਬਾਲਾ ਦੇ ਕਾਰਡ ਨੂੰ ਫਸਾਇਆ ਅਤੇ ਉਸਦੀ ਮਦਦ ਕਰਨ ਦੇ ਬਹਾਨੇ 40,000 ਰੁਪਏ ਕਢਵਾ ਲਏ। ਮੌਕੇ ‘ਤੇ ਪਹੁੰਚੇ ਐਸਐਚਓ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਸੀਸੀਟੀਵੀ ਫੁਟੇਜ ਖੰਗਾਲੀ ਜਾ ਰਹੀ ਹੈ।
ਇਹ ਘਟਨਾ ਜਲੰਧਰ ਦੇ ਰਾਮਾ ਮੰਡੀ ਇਲਾਕੇ ਵਿੱਚ ਵਾਪਰੀ ਹੈ। ਜਦੋਂ ਪੀੜਤ ਮਹਿਲਾ ਅਤੇ ਉਸਦਾ ਪਰਿਵਾਰ HDFC ਬੈਂਕ ਦੇ ਏਟੀਐਮ ਵਿੱਚੋਂ ਪੈਸੇ ਕਢਵਾਉਣ ਗਏ ਤਾਂ ਉਨ੍ਹਾਂ ਨੇ ਆਪਣਾ ਕਾਰਡ ਮਸ਼ੀਨ ਵਿੱਚ ਪਾ ਦਿੱਤਾ। ਹਾਲਾਂਕਿ ਨਾ ਤਾਂ ਪੈਸੇ ਅਤੇ ਨਾ ਹੀ ਕਾਰਡ ਪ੍ਰਾਪਤ ਹੋਇਆ। ਮਸ਼ੀਨ ‘ਤੇ ਇੱਕ ਜਾਅਲੀ ਹੈਲਪਲਾਈਨ ਨੰਬਰ ਲਗਾਇਆ ਗਿਆ ਸੀ, ਜਿਸ ‘ਤੇ ਉਨ੍ਹਾਂ ਨੂੰ ਸੰਪਰਕ ਕਰਨ ਦਾ ਝਾਂਸਾ ਦਿੱਤਾ ਗਿਆ ਸੀ।
ਓਥੇ ਨੇੜੇ ਖੜ੍ਹੇ ਕੁਝ ਅਣਪਛਾਤੇ ਨੌਜਵਾਨਾਂ ਨੇ ਪੀੜਤ ਨੂੰ ਭਰੋਸਾ ਦਿਵਾਇਆ ਕਿ ਇਹ ਨੰਬਰ ਬੈਂਕ ਦਾ ਹੈ ਅਤੇ ਕਾਲ ਕਰਕੇ ਬੈਂਕ ਕਰਮਚਾਰੀ ਆ ਕੇ ਮਸ਼ੀਨ ਨੂੰ ਠੀਕ ਕਰ ਦੇਣਗੇ। ਜਦੋਂ ਪੀੜਤ ਪਰਿਵਾਰ ਨੇ ਨੰਬਰ ‘ਤੇ ਫ਼ੋਨ ਕੀਤਾ ਤਾਂ ਆਰੋਪੀ ਉਨ੍ਹਾਂ ਨੂੰ ਗੱਲਾਂ ‘ਚ ਉਲਝਾਉਂਦੇ ਰਹੇ। ਇਸ ਦੌਰਾਨ ਠੱਗਾਂ ਨੇ ਚਲਾਕੀ ਨਾਲ ਉਨ੍ਹਾਂ ਦਾ ਪਿੰਨ ਦੇਖ ਲਿਆ ਅਤੇ ਕਾਰਡ ਦੀ ਵਰਤੋਂ ਕਰਕੇ ਚਾਰ ਵਾਰ ਉਨ੍ਹਾਂ ਦੇ ਖਾਤੇ ਵਿੱਚੋਂ ਪੈਸੇ ਕਢਵਾ ਲਏ।
ਪੀੜਤ ਨੇ ATM ਕਾਰਡ ਕੀਤਾ ਬਲੌਕ
ਜਦੋਂ ਤੱਕ ਪੀੜਤ ਨੂੰ ਅਹਿਸਾਸ ਹੋਇਆ ਕਿ ਉਨ੍ਹਾਂ ਨਾਲ ਧੋਖਾ ਹੋਇਆ ਹੈ, ਉਨ੍ਹਾਂ ਨੂੰ ਪਹਿਲਾਂ ਹੀ ਉਨ੍ਹਾਂ ਦੇ ਮੋਬਾਈਲ ਫੋਨ ‘ਤੇ ਪੈਸੇ ਕੱਟੇ ਜਾਣ ਬਾਰੇ ਮੈਸੇਜ ਆ ਚੁੱਕੇ ਸਨ। ਉਨ੍ਹਾਂ ਨੇ ਤੁਰੰਤ ਆਪਣਾ ਏਟੀਐਮ ਕਾਰਡ ਬਲਾਕ ਕਰ ਦਿੱਤਾ ਪਰ ਉਦੋਂ ਤੱਕ ਆਰੋਪੀ ਮੌਕੇ ਤੋਂ ਭੱਜ ਗਏ ਸਨ। ਪੀੜਤ ਦੇ ਅਨੁਸਾਰ ਇੱਕ ਆਰੋਪੀ ਨੇ ਲਾਲ ਟੀ-ਸ਼ਰਟ ਪਾਈ ਹੋਈ ਸੀ।
ਘਟਨਾ ਤੋਂ ਬਾਅਦ ਐਸਐਚਓ ਮੌਕੇ ‘ਤੇ ਪਹੁੰਚੇ
ਘਟਨਾ ਦੀ ਸੂਚਨਾ ਮਿਲਣ ‘ਤੇ ਐਸਐਚਓ ਡਿਵੀਜ਼ਨ ਨੰਬਰ 8 ਮੌਕੇ ‘ਤੇ ਪਹੁੰਚੇ। ਉਨ੍ਹਾਂ ਦੱਸਿਆ ਕਿ ਪੁਲਿਸ ਟੀਮ ਗਸ਼ਤ ‘ਤੇ ਸੀ ਜਦੋਂ ਉਨ੍ਹਾਂ ਨੇ ਏਟੀਐਮ ਦੇ ਬਾਹਰ ਭੀੜ ਦੇਖੀ। ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ATM ਮਸ਼ੀਨ ‘ਤੇ ਜੋ ਪਰਚੀ ਜਾਂ ਨੰਬਰ ਲਗਾਇਆ ਗਿਆ ਸੀ ,ਉਹ ਬੈਂਕ ਦਾ ਨਹੀਂ ਸੀ ,ਬਲਕਿ ਠੱਗਾਂ ਦਾ ਸੀ।
ਸੀਸੀਟੀਵੀ ਫੁਟੇਜ ਦੀ ਜਾਂਚ ਕਰ ਰਹੀ ਪੁਲਿਸ
ਪੁਲਿਸ ਹੁਣ ਘਟਨਾ ਦੇ ਸਮੇਂ ਦੀ ਸੀਸੀਟੀਵੀ ਫੁਟੇਜ ਪ੍ਰਾਪਤ ਕਰਨ ਲਈ ਬੈਂਕ ਨਾਲ ਸੰਪਰਕ ਕਰ ਰਹੀ ਹੈ। ਐਸਐਚਓ ਨੇ ਪੀੜਤ ਪਰਿਵਾਰ ਨੂੰ ਪੁਲਿਸ ਸਟੇਸ਼ਨ ਵਿੱਚ ਇੱਕ ਵਿਸਥਾਰਤ ਸ਼ਿਕਾਇਤ ਦਰਜ ਕਰਨ ਲਈ ਕਿਹਾ ਹੈ ਤਾਂ ਜੋ ਸਮੇਂ ਅਤੇ ਲੈਣ-ਦੇਣ ਦੇ ਆਧਾਰ ‘ਤੇ ਆਰੋਪੀ ਦੀ ਪਛਾਣ ਕੀਤੀ ਜਾ ਸਕੇ ਅਤੇ ਸਖ਼ਤ ਕਾਰਵਾਈ ਕੀਤੀ ਜਾ ਸਕੇ।
ਹੋਰ ਪੜ੍ਹੋ