Acidity Medicine : ਜੇਕਰ ਤੁਹਾਨੂੰ ਅਕਸਰ ਐਸੀਡਿਟੀ (Acidity) ਰਹਿੰਦੀ ਹੈ ਅਤੇ ਤੁਸੀਂ ਸਿੱਧੇ ਮੈਡੀਕਲ ਸਟੋਰ ਤੋਂ ਦਵਾਈ ਲੈ ਲੈਂਦੇ ਹੋ ਤਾਂ ਇਹ ਖ਼ਬਰ ਤੁਹਾਡੇ ਲਈ ਅਹਿਮ ਹੈ। ਹੁਣ ਵੋਨੋਪ੍ਰਾਜ਼ਾਨ (Vonoprazan) ਦਵਾਈ ਦੀ ਵਿਕਰੀ ਨੂੰ ਲੈ ਕੇ ਨਵੀਂ ਸ਼ਰਤ ਸਾਹਮਣੇ ਆਈ ਹੈ। ਸੈਂਟਰਲ ਡਰੱਗ ਸਟੈਂਡਰਡ ਕੰਟਰੋਲ ਆਰਗੇਨਾਈਜ਼ੇਸ਼ਨ (CDSCO) ਵੱਲੋਂ ਇਸ ਦਵਾਈ ਨੂੰ ਡਾਕਟਰ ਦੀ ਪਰਚੀ ਦੇ ਆਧਾਰ ’ਤੇ ਦੇਣ ਦੀ ਗੱਲ ਕਹੀ ਗਈ ਹੈ।
ਲੰਬੇ ਸਮੇਂ ਤੱਕ ਦਵਾਈ ਲੈਣ ’ਤੇ ਸਾਵਧਾਨੀ
CDSCO ਮੁਤਾਬਕ ਜੇਕਰ ਕਿਸੇ ਵਿਅਕਤੀ ਨੂੰ ਵਾਰ-ਵਾਰ ਐਸੀਡਿਟੀ ਹੁੰਦੀ ਹੈ ਅਤੇ ਉਹ ਲੰਬੇ ਸਮੇਂ ਤੋਂ ਦਵਾਈ ਲੈ ਰਿਹਾ ਹੈ ਤਾਂ ਇਸ ਦੇ ਪਿੱਛੇ ਦੀ ਅਸਲ ਵਜ੍ਹਾ ਪਤਾ ਕਰਨਾ ਜ਼ਰੂਰੀ ਹੈ। ਕੁਝ ਦਵਾਈਆਂ ਨੂੰ ਲੰਬੇ ਸਮੇਂ ਤੱਕ ਲੈਣ ਨਾਲ ਸਰੀਰ ਵਿੱਚ ਵਿਟਾਮਿਨ B12 ਅਤੇ ਮੈਗਨੀਸ਼ੀਅਮ (Magnesium) ਦੀ ਕਮੀ ਹੋ ਸਕਦੀ ਹੈ। ਹਾਲਾਂਕਿ ਇਸ ਦਾ ਇਹ ਮਤਲਬ ਨਹੀਂ ਕਿ ਦਵਾਈ ਲੈਣ ਵਾਲੇ ਹਰ ਵਿਅਕਤੀ ਨੂੰ ਇਹ ਸਮੱਸਿਆ ਜ਼ਰੂਰ ਹੋਵੇਗੀ। ਜੇਕਰ ਹਰ ਰੋਜ਼ ਜਾਂ ਲੰਬੇ ਸਮੇਂ ਤੱਕ ਐਸੀਡਿਟੀ ਦੀ ਦਵਾਈ ਲੈਣੀ ਪੈ ਰਹੀ ਹੈ ਤਾਂ ਡਾਕਟਰ ਨਾਲ ਸਲਾਹ ਕਰਨੀ ਚਾਹੀਦੀ ਹੈ।
ਪੇਟ ਅਤੇ ਆਂਤਾਂ ਦੀਆਂ ਬਿਮਾਰੀਆਂ ਵਿੱਚ ਵੀ ਪਰਚੀ ਜ਼ਰੂਰੀ
ਵੋਨੋਪ੍ਰਾਜ਼ਾਨ ਦੀ 10 ਅਤੇ 20 ਮਿਲੀਗ੍ਰਾਮ ਵਾਲੀ ਦਵਾਈ ਭਾਰਤ ਵਿੱਚ ਪਹਿਲਾਂ ਹੀ ਮਨਜ਼ੂਰ ਹੈ। ਹੁਣ ਇਸ ਦੀ ਦੁਕਾਨ ਤੋਂ ਵਿਕਰੀ ਡਾਕਟਰ ਦੀ ਪਰਚੀ ਦੇ ਆਧਾਰ ’ਤੇ ਕਰਨ ਦੀ ਗੱਲ ਸਾਹਮਣੇ ਆਈ ਹੈ। ਖ਼ਾਸ ਤੌਰ ’ਤੇ ਪੇਟ ਅਤੇ ਆਂਤਾਂ ਨਾਲ ਜੁੜੀਆਂ ਬਿਮਾਰੀਆਂ ਦੇ ਇਲਾਜ ਲਈ ਡਾਕਟਰ ਦੀ ਸਲਾਹ ਨੂੰ ਜ਼ਰੂਰੀ ਮੰਨਿਆ ਗਿਆ ਹੈ। ਦਵਾਈ ਸਬੰਧੀ ਹੋਰ ਜਾਂਚਾਂ ਕਰਨ ਦੀ ਵੀ ਗੱਲ ਕੀਤੀ ਗਈ ਹੈ।
ਫੈਟੀ ਲਿਵਰ ਦੀਆਂ ਨਵੀਆਂ ਦਵਾਈਆਂ ’ਤੇ ਟੈਸਟ
ਫੈਟੀ ਲਿਵਰ ਦੇ ਇਲਾਜ ਲਈ ਕੁਝ ਨਵੀਆਂ ਦਵਾਈਆਂ ’ਤੇ ਵੀ ਟੈਸਟ ਚੱਲ ਰਹੇ ਹਨ। ਇਨ੍ਹਾਂ ਵਿੱਚ ਐਫ੍ਰੁਕਸੀਫਰਮਿਨ (Efruxifermin) ਅਤੇ ਰੈਸਮੇਟੀਰੋਮ (Resmetirom) ਸ਼ਾਮਲ ਹਨ। ਐਫ੍ਰੁਕਸੀਫਰਮਿਨ ਦੇ ਤੀਜੇ ਪੜਾਅ ਦੇ ਟੈਸਟ ਨੂੰ ਅੱਗੇ ਵਧਾਉਣ ਦੀ ਗੱਲ ਕੀਤੀ ਗਈ ਹੈ। ਇਹ ਉਨ੍ਹਾਂ ਮਰੀਜ਼ਾਂ ਲਈ ਹੈ ਜਿਨ੍ਹਾਂ ਦੇ ਲਿਵਰ ਵਿੱਚ ਚਰਬੀ ਦੇ ਨਾਲ ਸੋਜ ਜਾਂ ਨੁਕਸਾਨ ਵਰਗੀ ਸਮੱਸਿਆ ਹੋ ਸਕਦੀ ਹੈ। ਰੈਸਮੇਟੀਰੋਮ ਦੀਆਂ ਵੱਖ-ਵੱਖ ਖੁਰਾਕਾਂ ’ਤੇ ਵੀ ਤੀਜੇ ਪੜਾਅ ਦੇ ਟੈਸਟ ਦੀ ਗੱਲ ਸਾਹਮਣੇ ਆਈ ਹੈ।
ਕਬਜ਼ ਅਤੇ ਪੇਟ ਦਰਦ ਲਈ ਦਵਾਈ ’ਤੇ ਵੀ ਜਾਂਚ
ਲੰਬੇ ਸਮੇਂ ਦੀ ਕਬਜ਼ ਦੇ ਨਾਲ ਪੇਟ ਦਰਦ ਅਤੇ ਹੋਰ ਲੱਛਣ ਹੋਣ ਦੀ ਸਥਿਤੀ ਨੂੰ IBS-C ਕਿਹਾ ਜਾਂਦਾ ਹੈ। ਇਸ ਦੇ ਇਲਾਜ ਲਈ ਲਿਨਾਕਲੋਟਾਈਡ (Linaclotide) ਦੀ ਵਰਤੋਂ ਕੀਤੀ ਜਾਂਦੀ ਹੈ। ਇਸ ਦੀਆਂ 72 ਅਤੇ 145 ਮਾਈਕ੍ਰੋਗ੍ਰਾਮ ਵਾਲੀਆਂ ਖੁਰਾਕਾਂ ਲੰਬੇ ਸਮੇਂ ਦੀ ਕਬਜ਼ ਲਈ ਵਰਤਣ ਦੀ ਸਿਫਾਰਸ਼ ਕੀਤੀ ਗਈ ਹੈ। ਜਦਕਿ ਕਬਜ਼ ਦੇ ਨਾਲ ਪੇਟ ਦਰਦ ਵਾਲੇ ਮਰੀਜ਼ਾਂ ਲਈ 290 ਮਾਈਕ੍ਰੋਗ੍ਰਾਮ ਵਾਲੀ ਖੁਰਾਕ ’ਤੇ ਵੀ ਟੈਸਟ ਦੀ ਗੱਲ ਸਾਹਮਣੇ ਆਈ ਹੈ।
ਸਿਕਲ ਸੈੱਲ ਬਿਮਾਰੀ ਵਿੱਚ ਬੱਚਿਆਂ ’ਤੇ ਹੋਵੇਗਾ ਟੈਸਟ
ਸਿਕਲ ਸੈੱਲ ਬਿਮਾਰੀ (Sickle Cell Disease) ਦੇ ਇਲਾਜ ਨਾਲ ਜੁੜੀ ਐਟਾਵੋਪਿਵਾਟ (Etavopivat) ਦਵਾਈ ਦੇ ਤੀਜੇ ਪੜਾਅ ਦੇ ਟੈਸਟ ਵਿੱਚ ਹੁਣ 6 ਤੋਂ 12 ਸਾਲ ਦੀ ਉਮਰ ਦੇ ਬੱਚਿਆਂ ਨੂੰ ਸ਼ਾਮਲ ਕਰਨ ਦੀ ਸਿਫਾਰਸ਼ ਕੀਤੀ ਗਈ ਹੈ। ਇਸ ਟੈਸਟ ਰਾਹੀਂ ਇਹ ਪਤਾ ਲਗਾਇਆ ਜਾਵੇਗਾ ਕਿ ਦਵਾਈ ਬੱਚਿਆਂ ਲਈ ਕਿੰਨੀ ਸੁਰੱਖਿਅਤ ਅਤੇ ਪ੍ਰਭਾਵਸ਼ਾਲੀ ਹੈ।
Check out below Health Tools-
Calculate Your Body Mass Index ( BMI )
Calculate The Age Through Age Calculator