ਨਵੀਂ ਦਿੱਲੀ: ਪਹਿਲਵਾਨ ਵਿਨੇਸ਼ ਫੋਗਾਟ ਨੇ ਅੱਜ ਸੋਸ਼ਲ ਮੀਡੀਆ ’ਤੇ ਇਹ ਸਾਬਤ ਕਰਨ ਲਈ ਬਿਨਾਂ ਤਾਰੀਕ ਵਾਲਾ ਇੱਕ ਪੱਤਰ ਸਾਂਝਾ ਕੀਤਾ ਕਿ ਪ੍ਰਦਰਸ਼ਨ ਕਰ ਰਹੇ ਛੇ ਪਹਿਲਵਾਨਾਂ ਨੇ ਏਸ਼ਿਆਈ ਖੇਡਾਂ ਦੇ ਟਰਾਇਲ ਤੋਂ ਛੋਟ ਦੀ ਮੰਗ ਨਹੀਂ ਕੀਤੀ ਸੀ ਅਤੇ ਉਨ੍ਹਾਂ ਸਿਰਫ਼ ਤਿਆਰੀ ਲਈ ਅਗਸਤ ਤੱਕ ਸਮਾਂ ਮੰਗਿਆ ਸੀ। ਵਿਨੇਸ਼ ਨੇ ਇਸ ਪੱਤਰ ਦੀ ਫੋਟੋ ਸਾਂਝੀ ਕੀਤੀ ਹੈ। ਆਈਓਏ ਦੀ ਐਡਹਾਕ ਕਮੇਟੀ ਨੇ ਇਨ੍ਹਾਂ ਛੇ ਪਹਿਲਵਾਨਾਂ ਨੂੰ ਛੋਟ ਦਿੰਦਿਆਂ ਸਿਰਫ਼ ਇੱਕ ਮੁਕਾਬਲੇ ਦਾ ਟਰਾਇਲ ਕਰਾਉਣ ਦਾ ਫ਼ੈਸਲਾ ਕੀਤਾ ਸੀ ਪਰ ਕਈ ਪਹਿਲਵਾਨਾਂ ਨੇ ਨਿਰਪੱਖ ਟਰਾਇਲ ਦੀ ਮੰਗ ਕੀਤੀ ਸੀ। ਵਿਨੇਸ਼ ਨੇ ਹਾਲਾਂਕਿ ਇਹ ਨਹੀਂ ਕਿਹਾ ਕਿ ਉਹ ਪੂਰੇ ਟਰਾਇਲ ’ਚ ਹਿੱਸਾ ਲੈਣ ਦੇ ਇੱਛੁਕ ਹਨ ਜਿਵੇਂ ਕਿ ਹੋਰ ਸਾਰੇ ਪਹਿਲਵਾਨ ਲੈ ਰਹੇ ਹਨ। -ਪੀਟੀਆਈ