Sridevi Property Dispute : ਮਰਹੂਮ ਬਾਲੀਵੁੱਡ ਅਦਾਕਾਰਾ ਸ਼੍ਰੀਦੇਵੀ ਦੀ ਪਰਿਵਾਰਕ ਜਾਇਦਾਦ ਨੂੰ ਲੈ ਕੇ ਚੱਲ ਰਹੇ ਵਿਵਾਦ ’ਤੇ ਸੁਪਰੀਮ ਕੋਰਟ ਨੇ ਪੱਖਾਂ ਨੂੰ ਆਪਸੀ ਗੱਲਬਾਤ ਰਾਹੀਂ ਮਾਮਲਾ ਸੁਲਝਾਉਣ ਦੀ ਸਲਾਹ ਦਿੱਤੀ ਹੈ। ਮਾਮਲਾ ਚੇਨਈ ਦੇ ਸ਼ੋਲੀੰਗਨੱਲੂਰ ਇਲਾਕੇ ਵਿੱਚ ਸਥਿਤ ਕਰੀਬ 4.77 ਏਕੜ ਜ਼ਮੀਨ ਨਾਲ ਸਬੰਧਤ ਹੈ। ਅਦਾਲਤ ਨੇ ਕਿਹਾ ਹੈ ਕਿ ਇਸ ਮਾਮਲੇ ਵਿੱਚ ਹਾਈ ਕੋਰਟ ਦੇ ਕਿਸੇ ਸਾਬਕਾ ਜੱਜ ਨੂੰ ਵਿਚੋਲਗੀ ਲਈ ਨਿਯੁਕਤ ਕੀਤਾ ਜਾਵੇਗਾ।
ਇਹ ਜ਼ਮੀਨ ਸ਼੍ਰੀਦੇਵੀ, ਉਨ੍ਹਾਂ ਦੀ ਮਾਂ ਅਤੇ ਭੈਣ ਨੇ 1988 ਵਿੱਚ ਚਾਰ ਵੱਖ-ਵੱਖ ਸੇਲ ਡੀਡ ਰਾਹੀਂ ਖਰੀਦੀ ਸੀ। ਸ਼੍ਰੀਦੇਵੀ ਦੀ 2018 ਵਿੱਚ ਮੌਤ ਤੋਂ ਬਾਅਦ 2023 ਵਿੱਚ ਰੈਵੇਨਿਊ ਰਿਕਾਰਡ ਵਿੱਚ ਉਨ੍ਹਾਂ ਦੇ ਪਤੀ ਬੋਨੀ ਕਪੂਰ ਅਤੇ ਧੀਆਂ ਜਾਹਨਵੀ ਕਪੂਰ ਤੇ ਖੁਸ਼ੀ ਕਪੂਰ ਦੇ ਨਾਮ ਦਰਜ ਕੀਤੇ ਗਏ। ਇਸ ਜ਼ਮੀਨ ’ਤੇ ਇਸ ਸਮੇਂ ਕਪੂਰ ਪਰਿਵਾਰ ਦਾ ਫਾਰਮ ਹਾਊਸ ਹੈ।
ਦੂਜੇ ਪਾਸੇ, ਐੱਮ.ਸੀ. ਸ਼ਿਵਕਾਮੀ, ਉਨ੍ਹਾਂ ਦੇ ਭਰਾ ਐੱਮ.ਸੀ. ਨਟਰਾਜਨ ਅਤੇ ਮਾਂ ਚੰਦਰਭਾਨੂ ਨੇ ਦਾਅਵਾ ਕੀਤਾ ਕਿ 1988 ਦੀ ਜ਼ਮੀਨ ਵਿਕਰੀ ਗੈਰ-ਕਾਨੂੰਨੀ ਸੀ। ਉਨ੍ਹਾਂ ਨੇ ਆਪਣੇ ਆਪ ਨੂੰ 1943 ਵਿੱਚ ਇਹ ਜ਼ਮੀਨ ਖਰੀਦਣ ਵਾਲੇ ਐੱਮ.ਸੀ. ਸੰਬੰਦ ਮੁਦਲਿਆਰ ਦੇ ਵੰਸ਼ਜ ਦੱਸਦਿਆਂ ਜਾਇਦਾਦ ਵਿੱਚ 1/5 ਹਿੱਸੇ ’ਤੇ ਹੱਕ ਜਤਾਇਆ ਹੈ।
ਮਾਮਲਾ ਪਹਿਲਾਂ ਹੇਠਲੀ ਅਦਾਲਤ ਅਤੇ ਫਿਰ ਮਦਰਾਸ ਹਾਈ ਕੋਰਟ ਪਹੁੰਚਿਆ। ਮਈ ਵਿੱਚ ਹਾਈ ਕੋਰਟ ਨੇ ਕਪੂਰ ਪਰਿਵਾਰ ਨੂੰ ਰਾਹਤ ਦਿੰਦਿਆਂ ਸਿਵਲ ਮੁਕੱਦਮਾ ਖਾਰਜ ਕਰ ਦਿੱਤਾ ਸੀ। ਅਦਾਲਤ ਨੇ ਕਿਹਾ ਸੀ ਕਿ 1988 ਦੀ ਵਿਕਰੀ ਨੂੰ ਕਰੀਬ 40 ਸਾਲ ਬਾਅਦ ਚੁਣੌਤੀ ਦਿੱਤੀ ਗਈ ਹੈ, ਜਿਸ ਕਾਰਨ ਇਹ ਮਾਮਲਾ ਕਾਨੂੰਨੀ ਸਮਾਂ-ਸੀਮਾ ਦੇ ਅਧੀਨ ਆਉਂਦਾ ਹੈ।
ਹਾਈ ਕੋਰਟ ਦੇ ਫੈਸਲੇ ਨੂੰ ਪਟੀਸ਼ਨਰਾਂ ਨੇ ਸੁਪਰੀਮ ਕੋਰਟ ਵਿੱਚ ਚੁਣੌਤੀ ਦਿੱਤੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਹਾਈ ਕੋਰਟ ਨੇ ਮਾਮਲੇ ਵਿੱਚ ਮਿਨੀ ਟ੍ਰਾਇਲ ਕੀਤਾ ਅਤੇ ਅੰਤਿਮ ਤੌਰ ’ਤੇ ਫੈਸਲਾ ਹੇਠਲੀ ਅਦਾਲਤ ਵਿੱਚ ਸੁਣਵਾਈ ਤੋਂ ਬਾਅਦ ਹੋਣਾ ਚਾਹੀਦਾ ਸੀ। ਸੁਪਰੀਮ ਕੋਰਟ ਦੀ ਜਸਟਿਸ ਕੇ. ਵਿਸ਼ਵਨਾਥਨ ਅਤੇ ਜਸਟਿਸ ਅਰੁਣ ਪੱਲੀ ਦੀ ਬੈਂਚ ਨੇ ਜ਼ਮੀਨ ਦੀ ਮੌਜੂਦਾ ਸਥਿਤੀ ਬਰਕਰਾਰ ਰੱਖਣ (Status Quo) ਦਾ ਹੁਕਮ ਦਿੱਤਾ ਹੈ। ਨਾਲ ਹੀ ਪੱਖਾਂ ਨੂੰ ਵਿਚੋਲਗੀ ਰਾਹੀਂ ਵਿਵਾਦ ਸੁਲਝਾਉਣ ਦੀ ਸਲਾਹ ਦਿੱਤੀ ਗਈ ਹੈ। ਮਾਮਲੇ ਦੀ ਅਗਲੀ ਸੁਣਵਾਈ 18 ਦਸੰਬਰ ਨੂੰ ਹੋਵੇਗੀ।