Sports News: ਆਈਪੀਐੱਲ 2026 ਵਿਚਾਲੇ ਕ੍ਰਿਕਟ ਜਗਤ ਤੋਂ ਵੱਡੀ ਖਬਰ ਸਾਹਮਣੇ ਆ ਰਹੀ ਹੈ। ਦੱਸ ਦੇਈਏ ਕਿ ਧਾਕੜ ਬੱਲੇਬਾਜ਼ ਮੈਦਾਨ ਵਿੱਚ ਅਚਾਨਕ ਲਹੂ-ਲੁਹਾਣ ਹੋ ਗਿਆ। ਦਰਅਸਲ, ਵੈਸਟਇੰਡੀਜ਼ ਚੈਂਪੀਅਨਸ਼ਿਪ 2026 ਦੌਰਾਨ ਲੀਵਾਰਡ ਆਈਲੈਂਡਜ਼ ਅਤੇ ਤ੍ਰਿਨੀਦਾਦ ਐਂਡ ਟੋਬੈਗੋ ਵਿਚਾਲੇ ਖੇਡੇ ਜਾ ਰਹੇ ਮੈਚ ਵਿੱਚ ਤੇਜ਼ ਗੇਂਦਬਾਜ਼ ਜੇਡਨ ਸੀਲਸ ਦੀ ਇੱਕ ਬਾਊਂਸਰ ਬੱਲੇਬਾਜ਼ ਜੇਰੇਮਾਇਆ ਲੂਈਸ ਦੇ ਸਿਰ ‘ਤੇ ਜਾ ਲੱਗੀ। ਲੂਈਸ ਸੰਭਲ ਨਹੀਂ ਸਕੇ ਅਤੇ ਸਿੱਧੇ ਜ਼ਮੀਨ ‘ਤੇ ਡਿੱਗ ਪਏ।
ਜਲਦੀ ਲਿਜਾਇਆ ਗਿਆ ਹਸਪਤਾਲ
ਇਸ ਹਾਦਸੇ ਵਿੱਚ ਸਿਰ ‘ਤੇ ਸੱਟ ਲੱਗਣ ਤੋਂ ਬਾਅਦ ਲੂਈਸ ਕਾਫੀ ਗੁੱਸੇ ਵਿੱਚ ਨਜ਼ਰ ਆਏ। ਉਨ੍ਹਾਂ ਨੇ ਉੱਠਦੇ ਹੀ ਗੁੱਸੇ ਵਿੱਚ ਆਪਣੇ ਹੈਲਮੇਟ ਨੂੰ ਲੱਤ ਮਾਰ ਦਿੱਤੀ। ਮੈਦਾਨ ‘ਤੇ ਹੀ ਉਨ੍ਹਾਂ ਨੂੰ ਤੁਰੰਤ ਡਾਕਟਰੀ ਸਹਾਇਤਾ ਦਿੱਤੀ ਗਈ ਅਤੇ ਸਿਰ ‘ਤੇ ਕੱਟ ਲੱਗਣ ਕਾਰਨ ਉਨ੍ਹਾਂ ਦੇ ਟਾਂਕੇ ਲਗਾਉਣੇ ਪਏ। ਬਾਅਦ ਵਿੱਚ ਉਨ੍ਹਾਂ ਨੂੰ ਸਟ੍ਰੇਚਰ ਰਾਹੀਂ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਫਿਲਹਾਲ ਉਨ੍ਹਾਂ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ।
ਖ਼ਤਰਨਾਕ ਪਿੱਚ ਕਾਰਨ ਮੈਚ ਹੋਇਆ ‘ਡਰਾਅ’
ਇਹ ਘਟਨਾ ਮੈਚ ਦੇ ਤੀਜੇ ਦਿਨ 48ਵੇਂ ਓਵਰ ਵਿੱਚ ਵਾਪਰੀ। ਪਿੱਚ ਦੇ ਖ਼ਤਰਨਾਕ ਅਤੇ ਅਨਿਸ਼ਚਿਤ ਵਿਵਹਾਰ ਨੂੰ ਦੇਖਦਿਆਂ ਅੰਪਾਇਰਾਂ ਅਤੇ ਮੈਚ ਰੈਫਰੀ ਨੇ ਖੇਡ ਨੂੰ ਜਾਰੀ ਰੱਖਣਾ ਸੁਰੱਖਿਅਤ ਨਹੀਂ ਸਮਝਿਆ ਅਤੇ ਮੈਚ ਨੂੰ ਡਰਾਅ ਘੋਸ਼ਿਤ ਕਰ ਦਿੱਤਾ। ਕ੍ਰਿਕਟ ਵੈਸਟਇੰਡੀਜ਼ ਨੇ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਖਿਡਾਰੀਆਂ ਦੀ ਸੁਰੱਖਿਆ ਸਭ ਤੋਂ ਉੱਪਰ ਹੈ।
ਸਰ ਵਿਵ ਰਿਚਰਡਸ ਸਟੇਡੀਅਮ ‘ਤੇ ਲੱਗੀ ਰੋਕ
ਬੋਰਡ ਨੇ ਇਹ ਵੀ ਫੈਸਲਾ ਲਿਆ ਹੈ ਕਿ ਹੁਣ ਇਸ ਮੈਦਾਨ (ਸਰ ਵਿਵ ਰਿਚਰਡਸ ਸਟੇਡੀਅਮ) ‘ਤੇ ਅਗਲੇ ਮੈਚ ਨਹੀਂ ਖੇਡੇ ਜਾਣਗੇ। ਇੱਥੇ ਹੁਣ ਸਿਰਫ਼ 17-20 ਮਈ ਨੂੰ ਹੋਣ ਵਾਲਾ ਫਾਈਨਲ ਮੁਕਾਬਲਾ ਹੀ ਕਰਵਾਇਆ ਜਾਵੇਗਾ, ਪਰ ਉਸ ਤੋਂ ਪਹਿਲਾਂ ਪਿੱਚ ਨੂੰ ਸੁਧਾਰਨ ਲਈ ਜ਼ਰੂਰੀ ਕਦਮ ਚੁੱਕੇ ਜਾਣਗੇ।
ਜਾਣਕਾਰੀ ਲਈ ਦੱਸ ਦੇਈਏ ਕਿ ਮੈਚ ਰੱਦ ਹੋਣ ਕਾਰਨ ਤੇਜ਼ ਗੇਂਦਬਾਜ਼ ਜੇਡਨ ਸੀਲਸ ਇੱਕ ਵੱਡਾ ਇਤਿਹਾਸਕ ਰਿਕਾਰਡ ਬਣਾਉਣ ਤੋਂ ਖੁੰਝ ਗਏ। ਉਨ੍ਹਾਂ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕਰਦਿਆਂ 7 ਵਿਕਟਾਂ ਝਟਕਾ ਲਈਆਂ ਸਨ ਅਤੇ ਉਹ ਇੱਕ ਪਾਰੀ ਵਿੱਚ ਸਾਰੀਆਂ 10 ਵਿਕਟਾਂ ਲੈਣ ਦੇ ਬੇਹੱਦ ਕਰੀਬ ਸਨ। ਜਿਸ ਸਮੇਂ ਮੈਚ ਰੋਕਿਆ ਗਿਆ, ਲੀਵਾਰਡ ਆਈਲੈਂਡਜ਼ ਦੀ ਟੀਮ 140/7 ਦੇ ਸਕੋਰ ‘ਤੇ ਸੀ।
ਹੋਰ ਪੜ੍ਹੋ