Punjabi Singer Ninja: ਪੰਜਾਬੀ ਗਾਇਕ ਨਿੰਜਾ ਅਤੇ ਸਾਊਂਡ ਆਪਰੇਟਰਾਂ ਵਿਚਾਲੇ ਵਿਵਾਦ ਘਟਣ ਦੀ ਬਜਾਏ ਵਧਦਾ ਹੀ ਜਾ ਰਿਹਾ ਹੈ। ਬਟਾਲਾ ਵਿੱਚ ਰੰਗਲਾ ਪੰਜਾਬ ਕੰਸਰਟ ਦੌਰਾਨ, ਨਿੰਜਾ ਦਾ ਮਾਈਕ ਦੋ-ਤਿੰਨ ਵਾਰ ਬੰਦ ਹੋ ਗਿਆ। ਇਸ ਤੋਂ ਗੁੱਸੇ ਵਿੱਚ ਆ ਕੇ, ਨਿੰਜਾ ਨੇ ਸਾਊਂਡ ਆਪਰੇਟਰ ਨੂੰ ਸਟੇਜ ਤੋਂ ਝਿੜਕਿਆ। ਇਸ ਤੋਂ ਬਾਅਦ, ਪੰਜਾਬ ਭਰ ਦੇ ਸਾਊਂਡ ਆਪਰੇਟਰਾਂ ਨੇ ਮੁਆਫ਼ੀ ਮੰਗਣ ਦੀ ਮੰਗ ਕਰਨੀ ਸ਼ੁਰੂ ਕਰ ਦਿੱਤੀ।
ਹੁਣ, ਮੰਡੀ ਗੋਬਿੰਦਗੜ੍ਹ ਵਿੱਚ ਸਖੀ ਸ਼ਕਤੀ ਮੇਲੇ ਦੌਰਾਨ, ਨਿੰਜਾ ਨੇ ਮਾਫ਼ੀ ਮੰਗਣ ਦੀ ਬਜਾਏ, ਸਾਊਂਡ ਆਪਰੇਟਰਾਂ ‘ਤੇ ਨਿਸ਼ਾਨਾ ਸਾਧਿਆ। ਉਨ੍ਹਾਂ ਨੇ ਕਿਹਾ ਕਿ ਉਸਨੂੰ ਪਤਾ ਲੱਗਾ ਹੈ ਕਿ ਸਾਊਂਡ ਆਪਰੇਟਰਾਂ ਦਾ ਆਪਣਾ ਭਾਈਚਾਰਾ ਹੈ ਅਤੇ ਉਹ ਉਸਦੇ ਖਿਲਾਫ ਧਰਨਾ ਦੇਣ ਜਾ ਰਹੇ ਹਨ।
ਨਿੰਜਾ ਨੇ ਕਿਹਾ ਕਿ ਗਰਮੀਆਂ ਵਿੱਚ ਕੰਮ ਘੱਟ ਰਹਿੰਦਾ ਹੈ, ਅਤੇ ਖਾਲੀ ਦਿਮਾਗ ਸ਼ੈਤਾਨ ਦਾ ਘਰ ਹੁੰਦਾ ਹੈ। ਨਿੰਜਾ ਦੇ ਇਸ ਬਿਆਨ ਤੋਂ ਬਾਅਦ, ਉਨ੍ਹਾਂ ਦਾ ਵੀਡੀਓ ਵਾਇਰਲ ਹੋ ਗਿਆ, ਜਿਸ ਨਾਲ ਵਿਵਾਦ ਮੁੜ ਸ਼ੁਰੂ ਹੋ ਗਿਆ।
ਸ਼ੋਅ ਦੌਰਾਨ ਮਾਈਕ ਬੰਦ ਹੋਣ ਤੇ ਵਿਵਾਦ ਸ਼ੁਰੂ ਹੋਇਆ
ਇਸ ਪੂਰੇ ਮਾਮਲੇ ਦੀ ਸ਼ੁਰੂਆਤ 28 ਅਗਸਤ ਨੂੰ ਬਟਾਲਾ ਦੀ ਦਾਣਾ ਮੰਡੀ ਵਿੱਚ ਆਯੋਜਿਤ ਰੰਗਲਾ ਪੰਜਾਬ ਪ੍ਰੋਗਰਾਮ ਨਾਲ ਹੋਈ ਸੀ। ਨਿੰਜਾ ਲਾਈਵ ਪਰਫਾਰਮਸ ਕਰ ਰਹੇ ਸੀ, ਉਸ ਦੌਰਾਨ ਸ਼ੋਅ ਦੇ ਵਿਚਾਲੇ ਉਨ੍ਹਾਂ ਦਾ ਮਾਈਕ ਦੋ ਜਾਂ ਤਿੰਨ ਵਾਰ ਬੰਦ ਹੋ ਗਿਆ। ਇਸ ਨਾਲ ਨਿੰਜਾ ਗੁੱਸੇ ਵਿੱਚ ਆ ਗਏ ਅਤੇ ਉਨ੍ਹਾਂ ਨੇ ਸਾਰੇ ਦਰਸ਼ਕਾਂ ਦੇ ਸਾਹਮਣੇ ਸਾਊਂਡ ਆਪਰੇਟਰ ਨੂੰ ਖਰੀ-ਖੋਟੀ ਸੁਣਾ ਦਿੱਤੀ।
ਉਨ੍ਹਾਂ ਨੇ ਕਿਹਾ, “ਬਟਾਲਾ ਵਾਲਿਆਂ ਮੈਂ ਤੁਹਾਡੇ ਕੋਲੋਂ ਹੱਥ ਜੋੜ ਕੇ ਮਾਫ਼ੀ ਮੰਗਦਾ ਹਾਂ। ਮੇਰੇ ਮਾਈਕ ਦੀ ਆਵਾਜ਼ ਹੀ ਬੰਦ ਕਰ ਦਿੱਤੀ ਗਈ ਹੈ। ਜੇਕਰ ਹੁਣ ਆਵਾਜ਼ ਰੁਕੀ ਤਾਂ ਮੈਂ ਬਿਨਾਂ ਮਾਈਕ ਦੇ ਇਕੱਲਾ ਹੀ ਗਾਵਾਂਗਾ ਜਾਂ ਫਿਰ ਗਾਵਾਂਗਾ ਹੀ ਨਹੀਂ। ਮੈਂ ਪ੍ਰਬੰਧਨ ਕਮੇਟੀ ਤੋਂ ਵੀ ਮਾਫ਼ੀ ਮੰਗਦਾ ਹਾਂ, ਕਿਉਂਕਿ ਗਾਉਂਦੇ ਸਮੇਂ ਬਹੁਤ ਜ਼ੋਰ ਲੱਗਦਾ ਹੈ ਅਤੇ ਮੈਂ ਨਹੀਂ ਚਾਹੁੰਦਾ ਕਿ ਅਜਿਹਾ ਦੁਬਾਰਾ ਹੋਵੇ।”
ਬਟਾਲਾ ਵਿੱਚ ਹੋਏ ਇਸ ਵਿਵਾਦ ਤੋਂ ਬਾਅਦ, ਉਨ੍ਹਾਂ ਦੀ ਵੀਡੀਓ ਵਾਇਰਲ ਹੋ ਰਹੀ ਹੈ। ਇਸ ਨਾਲ ਪੰਜਾਬ ਭਰ ਦੇ ਸਾਊਂਡ ਆਪਰੇਟਰਾਂ ਨੂੰ ਗੁੱਸਾ ਆਇਆ, ਜਿਨ੍ਹਾਂ ਨੇ ਨਿੰਜਾ ਨੂੰ ਮੁਆਫ਼ੀ ਮੰਗਣ ਲਈ ਕਿਹਾ। ਹਾਲਾਂਕਿ, ਨਿੰਜਾ ਨੇ ਮੁਆਫ਼ੀ ਮੰਗਣ ਤੋਂ ਇਨਕਾਰ ਕਰ ਦਿੱਤਾ।