Punjab News: ਜਗਰਾਉਂ ਵਿੱਚ ਸੁਨਿਆਰੇ ਦੀ ਦੁਕਾਨ ‘ਤੇ ਫਾਇਰਿੰਗ

ਜਗਰਾਉਂ ਦੇ ਭੀੜ-ਭੜੱਕੇ ਵਾਲੇ ਝਾਂਸੀ ਰਾਣੀ ਚੌਕ ਵਿੱਚ ਸਥਿਤ ਪ੍ਰਸਿੱਧ ਸੁਨਿਆਰੇ ਤੇ ਕਲੋਨਾਈਜ਼ਰ ਲੱਡੂ ਲੱਖੇ ਵਾਲੇ ਜਵੈਲਰਜ਼ ਦੀ ਦੁਕਾਨ ‘ਤੇ ਅੱਜ ਫਾਇਰਿੰਗ ਦੀ ਘਟਨਾ ਵਾਪਰੀ। ਦਿਨ-ਦਿਹਾੜੇ ਦੁਕਾਨ ‘ਤੇ ਗੋਲੀਆਂ ਚੱਲਣ ਕਰ ਕੇ ਸ਼ਹਿਰ ਅੰਦਰ ਸਹਿਮ ਦਾ ਮਾਹੌਲ ਪੈਦਾ ਹੋ ਗਿਆ।

ਫਾਇਰਿੰਗ ਕਰਨ ਵਾਲੇ ਇਕ ਮੋਟਰ ਸਾਈਕਲ ‘ਤੇ ਸਵਾਰ ਦੋ ਜਣੇ ਦੱਸੇ ਜਾਂਦੇ ਹਨ। ਦੋ ਗੋਲੀਆਂ ਦੁਕਾਨ ਦੇ ਸ਼ੀਸ਼ੇ ਵਿੱਚ ਲੱਗੀਆਂ। ਪੁਲੀਸ ਫੋਰਸ ਮੌਕੇ ‘ਤੇ ਪਹੁੰਚ ਗਈ ਸੀ ਅਤੇ ਜਾਂਚ ਆਰੰਭ ਦਿੱਤੀ ਹੈ।

ਡੀਐੱਸਪੀ ਜਸਜਯੋਤ ਸਿੰਘ ਵੀ ਮੌਕੇ ‘ਤੇ ਮੌਜੂਦ ਸਨ। ਜਦੋਂ ਇਹ ਫਾਇਰਿੰਗ ਹੋਈ ਤਾਂ ਕੁਝ ਔਰਤਾਂ ਸਮੇਤ ਹੋਰ ਗਾਹਕ ਦੁਕਾਨ ਅੰਦਰ ਗਹਿਣਿਆਂ ਦੀ ਖਰੀਦੋ ਫਰੋਖਤ ਕਰ ਰਹੇ ਸਨ। ਇਹ ਗੋਲੀਆਂ ਕਿਸੇ ਦੇ ਨਾ ਲੱਗਣ ਕਰਕੇ ਬਚਾਅ ਹੋ ਗਿਆ।

ਗੋਲੀ ਲੱਗਣ ਕਾਰਨ ਟੁੱਟੇ ਸ਼ੀਸ਼ੇ ਦੇ ਟੁਕੜੇ ਇਕ ਜਣੇ ਨੂੰ ਜ਼ਰੂਰ ਲੱਗੇ ਹਨ। ਪੁਲੀਸ ਨੇ ਸੀਸੀਟੀਵੀ ਫੁਟੇਜ ਦੇਖਣੀ ਸ਼ੁਰੂ ਕਰ ਦਿੱਤੀ ਹੈ ਤਾਂ ਜੋ ਫਾਇਰਿੰਗ ਕਰਨ ਵਾਲਿਆਂ ਦੀ ਪਛਾਣ ਹੋ ਸਕੇ।