ਪਟਨਾ ਤੋਂ ਲਖਨਊ ਜਾ ਰਹੀ ਇੰਡੀਗੋ ਏਅਰਲਾਈਨਜ਼ ਦੀ ਇੱਕ ਉਡਾਣ ਖਰਾਬ ਮੌਸਮ ਦੌਰਾਨ ਬਿਜਲੀ ਦੀ ਚਪੇਟ ਵਿੱਚ ਆ ਗਈ। ਜਦੋਂ ਜਹਾਜ਼ ਲਖਨਊ ਨੇੜੇ ਪਹੁੰਚਿਆ ਤਾਂ ਲਗਭਗ 17,000 ਫੁੱਟ ਦੀ ਉਚਾਈ ‘ਤੇ ਸੀ, ਜਿਸ ਵੇਲੇ ਉਸ ‘ਤੇ ਬਿਜਲੀ ਡਿੱਗਣ ਦੀ ਖ਼ਬਰ ਸਾਹਮਣੇ ਆਈ।
ਗਨੀਮਤ ਰਹੀ ਕਿ ਬਿਜਲੀ ਡਿੱਗਣ ਦੇ ਬਾਵਜੂਦ ਉਡਾਣ ਸੰਚਾਲਨ ਆਮ ਰਿਹਾ ਅਤੇ ਪਾਇਲਟ ਨੇ ਬਿਨਾਂ ਕਿਸੇ ਵੀ ਤਰ੍ਹਾਂ ਦੀ ਸਮੱਸਿਆ ਤੋਂ ਬਿਨਾਂ ਲਖਨਊ ਦੇ ਚੌਧਰੀ ਚਰਨ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਜਹਾਜ਼ ਨੂੰ ਸੁਰੱਖਿਅਤ ਲੈਂਡ ਕਰਵਾ ਲਿਆ। ਹਾਲਾਂਕਿ ਇਸ ਘਟਨਾ ਨਾਲ ਜਹਾਜ਼ ਵਿੱਚ ਸਵਾਰ ਲਗਭਗ 104 ਯਾਤਰੀਆਂ ਦੇ ਸਾਹ ਸੁੱਕ ਗਏ ਸਨ ਪਰ ਪਾਇਲਟ ਦੀ ਸਮਝਦਾਰੀ ਨਾਲ ਸਾਰੇ ਯਾਤਰੀ ਸਹੀ ਸਲਾਮਤ ਰਹੇ।
ਉਡਾਣ ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਪਹੁੰਚੀ ਲਖਨਊ
ਇੰਡੀਗੋ ਦੀ ਨਿਰਧਾਰਤ ਘਰੇਲੂ ਉਡਾਣ 6E925 ਪਟਨਾ ਤੋਂ ਲਖਨਊ ਲਈ ਦੁਪਹਿਰ 3:10 ਵਜੇ ਰਵਾਨਾ ਹੋਈ। ਇਸਨੇ ਲਖਨਊ 4:20 ਵਜੇ ਪਹੁੰਚਣਾ ਸੀ, ਪਰ ਖਰਾਬ ਮੌਸਮ ਕਾਰਨ, ਉਡਾਣ 4:05 ਵਜੇ ਦੇ ਕਰੀਬ ਲਖਨਊ ਹਵਾਈ ਅੱਡੇ ‘ਤੇ ਉਤਰ ਗਈ
ਅਹਿਮਦਾਬਾਦ ਜਾਣ ਵਾਲੀ ਇੱਕ ਉਡਾਣ ਵੀ ਪ੍ਰਭਾਵਿਤ ਹੋਈ
ਲਖਨਊ ਪਹੁੰਚਣ ਤੋਂ ਬਾਅਦ, ਇਸੇ ਉਡਾਣ ਨੇ 6E6968 ਦੇ ਰੂਪ ਵਿੱਚ ਅਹਿਮਦਾਬਾਦ ਲਈ ਰਵਾਨਾ ਹੋਣਾ ਸੀ। ਹਾਲਾਂਕਿ, ਨਿਰੀਖਣ ਦੌਰਾਨ, ਇੱਕ ਤਕਨੀਕੀ ਖਰਾਬੀ ਦਾ ਪਤਾ ਲੱਗਿਆ। ਬਾਅਦ ਵਿੱਚ ਉਡਾਣ ਨੂੰ ਹਵਾਈ ਅੱਡੇ ‘ਤੇ ਰੋਕ ਲਿਆ ਗਿਆ।
ਯਾਤਰੀਆਂ ਨੂੰ ਪਰੇਸ਼ਾਨੀ ਨਾ ਹੋਵੇ, ਇਸ ਲਈ ਇੰਡੀਗੋ ਏਅਰਲਾਈਨਜ਼ ਨੇ ਦੂਜੀ ਉਡਾਣ ਦਾ ਪ੍ਰਬੰਧ ਕੀਤਾ। ਫਿਰ ਯਾਤਰੀਆਂ ਨੂੰ ਦੂਜੀ ਉਡਾਣ ਰਾਹੀਂ ਸ਼ਾਮ 6:22 ਵਜੇ ਅਹਿਮਦਾਬਾਦ ਲਈ ਰਵਾਨਾ ਕੀਤਾ ਗਿਆ।