ਟ੍ਰਿਬਿਊਨ ਨਿਊਜ਼ ਸਰਵਿਸ
ਚੰਡੀਗੜ੍ਹ, 11 ਫਰਵਰੀ
ਯੂਕੇ-ਇੰਡੀਆ ਯੰਗ ਪ੍ਰੋਫੈਸ਼ਨਲ ਸਕੀਮ (ਵਾਈਪੀਐਸ) 2025 ਬੈਲੇਟ ਅਗਲੇ ਹਫ਼ਤੇ ਖੁੱਲੇਗੀ। ਇਹ ਵੀਜ਼ਾ ਸਕੀਮ ਬ੍ਰਿਟਿਸ਼ ਅਤੇ ਭਾਰਤੀਆਂ ਨੂੰ ਦੋ ਸਾਲਾਂ ਤੱਕ ਦੂਜੇ ਦੇਸ਼ ਵਿੱਚ ਰਹਿਣ, ਅਧਿਐਨ ਕਰਨ, ਯਾਤਰਾ ਕਰਨ ਅਤੇ ਕੰਮ ਕਰਨ ਦਾ ਮੌਕਾ ਪ੍ਰਦਾਨ ਕਰਦੀ ਹੈ। 18-30 ਸਾਲ ਦੀ ਉਮਰ ਦੇ ਭਾਰਤੀ ਨਾਗਰਿਕਾਂ ਨੂੰ ਸਕੀਮ ਅਧੀਨ ਉਪਲਬਧ 3,000 ਥਾਵਾਂ ਵਿੱਚੋਂ ਇੱਕ ਵਾਸਤੇ ਵਿਚਾਰੇ ਜਾਣ ਲਈ gov.uk ’ਤੇ ਬੈਲੇਟ ਦਾਖਲ ਕਰਨਾ ਹੋਵੇਗਾ। ਬੈਲੇਟ 18 ਫਰਵਰੀ ਨੂੰ ਖੁੱਲ੍ਹ ਕੇ 20 ਫਰਵਰੀ ਨੂੰ ਬੰਦ ਹੋ ਜਾਣਗੇ। ਬਿਨੈਕਾਰਾਂ ਨੂੰ ਬੈਲੇਟ ਵਿੱਚ ਦਾਖਲ ਹੋਣ ਲਈ ਕਿਸੇ ਭੁਗਤਾਨ ਦੀ ਲੋੜ ਨਹੀਂ ਅਤੇ ਸਫਲ ਐਂਟਰੀਆਂ ਨੂੰ ਰੈਂਡਮਲੀ ਚੁਣਿਆ ਜਾਵੇਗਾ। ਚੰਡੀਗੜ੍ਹ ਵਿਚ ਬ੍ਰਿਟਿਸ਼ ਡਿਪਟੀ ਹਾਈ ਕਮਿਸ਼ਨਰ ਕੈਰੋਲੀਨ ਰੋਵੇਟ ਨੇ ਕਿਹਾ ਕਿ ਇਹ ਸਕੀਮ ਦੋਵਾਂ ਮੁਲਕਾਂ ਦੇ ਸਬੰਧਾਂ ਨੂੰ ਮਜ਼ਬੂਤ ਕਰਨ ਅਤੇ ਗਲੋਬਲ ਕਰੀਅਰ ਬਣਾਉਣ ਦਾ ਵਧੀਆ ਮੌਕਾ ਹੈ।