ਗਗਨਦੀਪ ਅਰੋੜਾ
ਲੁਧਿਆਣਾ, 19 ਅਪਰੈਲ
ਸ਼ਹਿਰ ਦੇ ਪੁਲੀਸ ਕਮਿਸ਼ਨਰ ਦਾ ਅਹੁਦਾ ਸੰਭਾਲਣ ਤੋਂ ਬਾਅਦ ਪੁਲੀਸ ਕਮਿਸ਼ਨਰ ਸਵਪਨ ਸ਼ਰਮਾ ਲਗਾਤਾਰ ਆਪਣੇ ਅੰਦਾਜ਼ ਵਿੱਚ ਕੰਮ ਕਰ ਰਹੇ ਹਨ। ਸ਼ਹਿਰ ਦੇ ਕਈ ਇਲਾਕਿਆਂ ਵਿੱਚ ਸ਼ਹਿਰ ਵਾਸੀਆਂ ਨੂੰ ਟਰੈਫਿਕ ਜਾਮ ਤੋਂ ਰਾਹਤ ਦੇਣ ’ਤੇ ਜ਼ੋਰ ਦਿੱਤਾ ਜਾ ਰਿਹਾ ਹੈ। ਕਮਿਸ਼ਨਰੇਟ ਪੁਲੀਸ ਨੇ ਬਿਹਤਰ ਪ੍ਰਬੰਧਨ ਲਈ ਅੱਜ ਐਮਰਜੈਂਸੀ ਰਿਸਪਾਂਸ ਵਾਹਨ ਤਾਇਨਾਤ ਕੀਤੇ। ਇਨ੍ਹਾਂ ਵਾਹਨਾਂ ਦੀ ਵਰਤੋਂ ਟਰੈਫਿਕ ਨੂੰ ਕੰਟਰੋਲ ਕਰਨ ਦੇ ਨਾਲ-ਨਾਲ ਛੋਟੇ ਅਪਰਾਧਾਂ ਲਈ ਵੀ ਕੀਤੀ ਜਾਵੇਗੀ। ਇਹ ਵਾਹਨ ਦੋ ਸ਼ਿਫਟਾਂ ਵਿੱਚ ਕੰਮ ਕਰਨਗੇ ਅਤੇ ਕਰਮਚਾਰੀ ਡਿਜੀਟਲ ਸਹੂਲਤਾਂ ਦੇ ਨਾਲ-ਨਾਲ ਛੋਟੇ ਹਥਿਆਰ ਵੀ ਰੱਖਣਗੇ। ਇਸ ਦੇ ਨਾਲ ਹੀ ਗੱਡੀ ਵਿੱਚ ਇੱਕ ਪੂਰਾ ਜੀਪੀਐੱਸ ਸਿਸਟਮ ਲਗਾਇਆ ਗਿਆ ਹੈ।
ਪੁਲੀਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਸ਼ਹਿਰ ਵਿੱਚ ਇੱਕ ਨਵੀਂ ਐਂਟੀਗ੍ਰੇਟਡ ਪ੍ਰਣਾਲੀ ਦਾ ਐਲਾਨ ਕੀਤਾ ਹੈ। ਇਹ ਪ੍ਰਬੰਧ ਪੁਲੀਸ ਕੰਟਰੋਲ ਰੂਮ (ਪੀਸੀਆਰ), ਟਰੈਫਿਕ ਸ਼ਾਖਾ ਅਤੇ ਸੀਸੀਟੀਵੀ ਨਿਗਰਾਨੀ ਨੂੰ ਇੱਕ ਏਕੀਕ੍ਰਿਤ ਕਮਾਂਡ ਢਾਂਚੇ ਅਧੀਨ ਲਿਆਏਗਾ। ਪੁਲੀਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਕਿਹਾ ਕਿ ਟਰੈਫਿਕ ਅਤੇ ਪੀਸੀਆਰ ਨੂੰ ਜੋੜ ਦਿੱਤਾ ਗਿਆ ਹੈ। ਪੁਲੀਸ ਕਮਿਸ਼ਨਰ ਨੇ ਕਿਹਾ ਕਿ ਇਨ੍ਹਾਂ ਵਾਹਨਾਂ ਵਿੱਚ ਤਾਇਨਾਤ ਸਟਾਫ਼ ਡਿਜੀਟਲ ਸਹੂਲਤਾਂ ਨਾਲ ਲੈਸ ਹੋਵੇਗਾ। ਸਭ ਗੱਡੀ ਵਿੱਚ ਵਾਕੀ-ਟਾਕੀ ਸੈੱਟ, ਇੱਕ ਛੋਟਾ ਹਥਿਆਰ ਅਤੇ ਜੀਪੀਐਸ ਲੱਗਿਆ ਹੋਵੇਗਾ।
ਇਹ ਰੋਜ਼ਾਨਾ ਉਨ੍ਹਾਂ ਥਾਵਾਂ ’ਤੇ ਜਾਣਗੇ ਜਿੱਥੇ ਟਰੈਫਿਕ ਜਾਮ ਦੀ ਸਮੱਸਿਆ ਹੈ। ਜੇਕਰ ਉਨ੍ਹਾਂ ਨੂੰ ਕਿਤੇ ਵੀ ਮੈਨਪਾਵਰ ਦੀ ਲੋੜ ਹੋਵੇਗੀ ਤਾਂ ਉਹ ਤੁਰੰਤ ਸਬੰਧਤ ਪੁਲੀਸ ਸਟੇਸ਼ਨ ਤੋਂ ਪੁਲੀਸ ਫੋਰਸ ਮੰਗਵਾ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਪੁਲੀਸ ਦੇ ਇਸ ਯਤਨ ’ਤੇ ਫੀਡਬੈਕ ਵੀ ਦੇਣਾ ਚਾਹੀਦਾ ਹੈ। ਇਨ੍ਹਾਂ ਗੱਡੀਆਂ ’ਤੇ ਤਾਇਨਾਤ ਸਟਾਫ 2 ਸ਼ਿਫਟਾਂ ਵਿੱਚ 24 ਘੰਟੇ ਡਿਊਟੀ ਕਰੇਗਾ। ਇਸ ਵੇਲੇ ਕੁਝ ਮੁਲਾਜ਼ਮਾਂ ਦੀ ਘਾਟ ਹੈ, ਪਰ ਮੁਲਾਜ਼ਮਾਂ ਦੀ ਗਿਣਤੀ ਜਲਦੀ ਹੀ ਪੂਰੀ ਕਰ ਲਈ ਜਾਵੇਗੀ।
ਪੁਲੀਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਕਿਹਾ ਕਿ 2 ਤੋਂ 3 ਦਿਨਾਂ ਵਿੱਚ ਲਗਭਗ 8 ਸੜਕਾਂ ਨੂੰ ਨੋ ਟਾਲਰੈਂਸ ਸੜਕਾਂ ਐਲਾਨਿਆ ਜਾਵੇਗਾ। ਇਹ ਉਹ ਸੜਕਾਂ ਹੋਣਗੀਆਂ ਜਿੱਥੇ ਟਰੈਫਿਕ ਜਾਮ ਜ਼ਿਆਦਾ ਹੋਵੇਗਾ। ਨਗਰ ਨਿਗਮ ਦਾ ਵੀ ਪੂਰਾ ਸਹਿਯੋਗ ਲਿਆ ਜਾਵੇਗਾਤਾਂ ਜੋ ਗਲੀ-ਮੁਹੱਲਿਆਂ ਦੇ ਵਿਕਰੇਤਾਵਾਂ ਨੂੰ ਵੀ ਕਾਰੋਬਾਰ ਕਰਨ ਲਈ ਇੱਕ ਵੱਖਰੀ ਜਗ੍ਹਾਂ ਮਿਲ ਸਕੇ। ਜ਼ੋਨ ਇੰਚਾਰਜ ਅਤੇ ਐਸਐਚਓ ਦੀ ਇੱਕ ਵਿਸ਼ੇਸ਼ ਟੀਮ ਬਣਾਈ ਗਈ ਹੈ। ਪੁਲੀਸ ਵਿਭਾਗ ਵਿੱਚ ਕਰਮਚਾਰੀਆਂ ਨੂੰ ਉਨ੍ਹਾਂ ਥਾਵਾਂ ਤੋਂ ਹਟਾ ਦਿੱਤਾ ਜਾਵੇਗਾ ਜਿੱਥੇ ਪੁਲੀਸ ਦੀ ਗਤੀਵਿਧੀ ਘੱਟ ਹੈ ਅਤੇ ਟਰੈਫਿਕ ਵਿੱਚ ਤਾਇਨਾਤ ਕੀਤਾ ਜਾਵੇਗਾ।
The post ਟਰੈਫਿਕ ਜਾਮ ਦੀ ਸਥਿਤੀ ਨਾਲ ਨਜਿੱਠੇਗੀ ਲੁਧਿਆਣਾ ਪੁਲੀਸ appeared first on Punjabi Tribune.
News Source link
#ਟਰਫਕ #ਜਮ #ਦ #ਸਥਤ #ਨਲ #ਨਜਠਗ #ਲਧਆਣ #ਪਲਸ