ਵਾਸ਼ਿੰਗਟਨ, 20 ਜਨਵਰੀ
ਡੋਨਲਡ ਟਰੰਪ ਜਲਦੀ ਹੀ ਅਮਰੀਕਾ ਦੇ 47ਵੇਂ ਰਾਸ਼ਟਰਪਤੀ ਵਜੋਂ ਹਲਫ਼ ਲੈਣਗੇ। ਟਰੰਪ ਦਾ ਹਲਫ਼ਦਾਰੀ ਸਮਾਗਮ, ਜਿਹੜਾ ਪਹਿਲਾਂ ਕੈਪੀਟਲ ਹਿੱਲ (ਦੇਸ਼ ਦੀ ਸੰਸਦ ) ਦੇ ਬਾਹਰ ਹੋਣਾ ਸੀ ਹੁਣ ਅਤਿ ਦੀ ਠੰਢ ਕਰਕੇ ਇਨਡੋਰ ਹੋਵੇਗਾ। ਮਨੋਨੀਤ ਰਾਸ਼ਟਰਪਤੀ ਟਰੰਪ ਵੱਲੋਂ ਅੱਜ ਸੇਂਟ ਜੌਹਨ ਐਪੀਸਕੋਪਲ ਗਿਰਜਾਘਰ ਵਿਚ ਕੀਤੀ ਸੇਵਾ ਨਾਲ ਉਨ੍ਹਾਂ ਦੇ ਹਲਫ਼ਦਾਰੀ ਸਮਾਗਮ ਦਾ ਆਗਾਜ਼ ਹੋ ਗਿਆ। ਅਮਰੀਕਾ ਦੇ ਮਨੋਨੀਤ ਰਾਸ਼ਟਰਪਤੀ ਨੂੰ ਅਹੁਦੇ ਦਾ ਹਲਫ਼ ਲੈਣ ਤੋਂ ਪਹਿਲਾਂ ਇਸ ਗਿਰਜਾਘਰ ਵਿਚ ਸਰਵਿਸ ਕਰਨੀ ਪੈਂਦੀ ਹੈ। ਵ੍ਹਾਈਟ ਹਾਊਸ ਪੁੱਜਣ ਉੱਤੇ ਬਾਇਡਨ ਤੇ ਪ੍ਰਥਮ ਮਹਿਲਾ ਜਿਲ ਬਾਇਡਨ ਨੇ ਟਰੰਪ ਦੰਪਤੀ ਦਾ ਰੈੱਡ ਕਾਰਪੈੱਟ ਸਵਾਗਤ ਕੀਤਾ। ਇਸ ਨਿੱਜੀ ਮੁਲਾਕਾਤ ਤੋਂ ਪਹਿਲਾਂ ਰਾਸ਼ਟਰਪਤੀ ਬਾਇਡਨ ਤੇ ਮਨੋਨੀਤ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਤਸਵੀਰਾਂ ਖਿਚਵਾਈਆਂ। ਟਰੰਪ ਜਿਵੇਂ ਹੀ ਕਾਰ ’ਚੋਂ ਬਾਹਰ ਨਿਕਲੇ ਤਾਂ ਬਾਇਡਨ ਨੇ ਉਨ੍ਹਾਂ ਨੂੰ ਕਿਹਾ, ‘‘ਘਰ ਵਿਚ ਤੁਹਾਡਾ ਸਵਾਗਤ ਹੈ।’’ ਅੱਜ ਦੇ ਹਲਫ਼ਦਾਰੀ ਸਮਾਗਮ ਵਿਚ ਪਿਛਲੇ ਟਰੰਪ ਪ੍ਰਸ਼ਾਸਨ ਦੇ ਕੁਝ ਅਧਿਕਾਰੀ ਵੀ ਸ਼ਾਮਲ ਹੋਣਗੇ, ਜਿਨ੍ਹਾਂ ਵਿਚ ਅਰਕਾਨਸਸ ਦੇ ਗਵਰਨਰ ਸਾਰ੍ਹਾ ਹਕਾਬੀ ਸੈਂਡਰਜ਼, ਕੈਲੀਏਨ ਕੌਨਵੇੇਅ, ਟੈਕਸਸ ਤੋਂ ਰਿਪਬਲਿਕਨ ਰੌਨੀ ਜੈਕਸਨ ਵੀ ਸ਼ਾਮਲ ਹਨ। ਜੈਕਸਨ ਵ੍ਹਾਈਟ ਹਾਊਸ ਵਿਚ ਟਰੰਪ ਦੇ ਡਾਕਟਰ ਸਨ। ਹਲਫ਼ਦਾਰੀ ਸਮਾਗਮ ਦੌਰਾਨ ਟਰੰਪ ਦੋ ਬਾਈਬਲਾਂ ਤੋਂ ਸਹੁੰ ਚੁੱਕਣਗੇ। ਇਨ੍ਹਾਂ ਵਿਚੋਂ ਇਕ ਬਾਈਬਲ 1955 ਵਿਚ ਟਰੰਪ ਨੂੰ ਉਨ੍ਹਾਂ ਦੀ ਮਾਂ ਨੇ ਦਿੱਤੀ ਸੀ ਜਦੋਂਕਿ ਦੂਜੀ ਬਾਈਬਲ ਲਿੰਕਨ ਬਾਈਬਲ ਹੈ। ਰਾਸ਼ਟਰਪਤੀ ਅਬਰਾਹਮ ਲਿੰਕਨ ਨੇ ਵੀ ਇਸੇ ਬਾਈਬਲ ਤੋਂ ਸਹੁੰ ਚੁੱਕੀ ਸੀ। ਟਰੰਪ ਨੂੰ ਹਲਫ਼ ਦਿਵਾਉਣ ਦੀ ਰਸਮ ਚੀਫ ਜਸਟਿਸ ਜੌਨ ਰੌਬਰਟਸ ਸੌਂਹ ਨਿਭਾਉਣਗੇ। ਉਧਰ ਉਪ ਰਾਸ਼ਟਰਪਤੀ ਜੇਡੀ ਵਾਂਸ ਹਲਫ਼ ਲੈਣ ਲਈ ਆਪਣੀ ਨਿੱਜੀ ਬਾਈਬਲ ਵਰਤਣਗੇ। ਵਾਂਸ ਨੂੰ ਇਹ ਬਾਈਬਲ ਉਨ੍ਹਾਂ ਦੀ ਪੜਦਾਦੀ ਨੇ ਦਿੱਤੀ ਸੀ। ਵਾਂਸ ਨੂੰ ਸੁਪਰੀਮ ਕੋਰਟ ਦੇ Justice Brett Kavanaugh ਸਹੁੰ ਚੁਕਾਉਣਗੇ। ਟਰੰਪ ਦੇ ਹਲਫ਼ਦਾਰੀ ਸਮਾਗਮ ’ਚ ਸ਼ਾਮਲ ਹੋਣ ਵਾਲੇ ਆਲਮੀ ਆਗੂਆਂ ਵਿਚ ਇਟਲੀ ਦੀ ਪ੍ਰਧਾਨ ਮੰਤਰੀ ਜੌਰਜੀਆ ਮਿਲੋਨੀ, ਹੰਗਰੀ ਦੇ ਪ੍ਰਧਾਨ ਮੰਤਰੀ ਵਿਕਟਰ ਓਰਬਨ, ਚੀਨ ਦੇ ਉਪ ਰਾਸ਼ਟਰਪਤੀ ਹੈਨ ਜ਼ੈਂਗ, ਅਰਜਨਟੀਨਾ ਦੇ ਰਾਸ਼ਟਰਪਤੀ ਜੇਵੀਅਰ ਮਿਲਈ, ਇਕੁਆਡੋਰ ਦੇ ਰਾਸ਼ਟਰਪਤੀ ਡੈਨੀਅਲ, ਭਾਰਤ ਦੇ ਵਿਦੇਸ਼ ਮੰਤਰੀ ਐੱਸ.ਜੈਸ਼ੰਕਰ, ਆਸਟਰੇਲੀਆ ਦੀ ਵਿਦੇਸ਼ ਮੰਰਤੀ ਪੈਨੀ ਵੌਂਗ ਤੇ ਜਪਾਨ ਦੇ ਵਿਦੇਸ਼ ਮੰਤਰੀ ਤਾਕੇਸ਼ੀ ਇਵਾਇਆ ਸ਼ਾਮਲ ਹਨ। ਸਮਾਗਮ ’ਚ ਹਾਜ਼ਰੀ ਭਰਨ ਵਾਲੇ ਟੈੱਕ ਜਾਇੰਟਸ ਵਿਚ ਟੈਸਲਾ ਸਪੇਸਐਕਸ ਦੇ ਐਲਨ ਮਸਕ, ਐਮਾਜ਼ੋਨ ਦੇ ਜੈਫ ਬੈਜ਼ੋਜ਼, ਮੈਟਾ ਦੇ ਮਾਰਕ ਜ਼ਕਰਬਰਗ, ਟਿਕਟੌਕ ਦੇ ਸੂ ਜ਼ੀ ਚਿਊ, ਐਪਲ ਦੇ ਟਿਮ ਕੁੱਕ, ਓਪਨਏਆਈ ਦੇ ਸੈਮ ਐਲਟਮੈਨ ਤੇ ਗੂਗਲ ਦੇ ਸੁੰਦਰ ਪਿਚਾਈ ਆਦਿ ਸ਼ਾਮਲ ਹਨ। ਇਸ ਦੌਰਾਨ ਭਾਰਤ ਦੇ ਵਿਦੇਸ਼ ਮੰਤਰੀ ਐੱਸ.ਜੈਸ਼ੰਕਰ ਨੇ ਕਿਹਾ ਕਿ ਉਹ ਡੋਨਲਡ ਟਰੰਪ ਦੇ ਹਲਫ਼ਦਾਰੀ ਸਮਾਗਮ ’ਚ ਭਾਰਤ ਦੀ ਨੁਮਾਇੰਦਗੀ ਕਰਦਿਆਂ ਮਾਣ ਮਹਿਸੂਸ ਕਰ ਰਹੇ ਹਨ।